عمران خان کی ناکامی کی وجہ منفی سیاست، جھوٹ اور حسد ہے، مریم اورنگزیب

اسلام آباد میں (ن) لیگ کے رہنماؤں کے ہمراہ پریس کانفرنس کرتے ہوئے وزیرمملکت برائے اطلاعات مریم اورنگزیب کا کہنا تھا کہ عمران خان نے ساڑھے 3 سال میں 25 سے 26 بلین جھوٹ بولے اور سیکڑوں یو ٹرن لئے جب کہ انہیں دوسروں پر الزامات لگاتے ہوئے شرم نہیں آتی، انہیں جہاں جہاں اور جس جگہ موقع ملتا ہے وہ الزام تراشی شروع کردیتے ہیں۔ ان کا کہنا تھا کہ عمران خان کی ناکامی کی وجہ ہی ان کی جھوٹ بولنے کی عادت، منفی سیاست اور حسد ہے۔

وزیرمملکت نے کہا کہ عمران خان نے اب خیبرپختون خوا اسمبلی کے اسپیکر اسد قیصر کے خلاف کرپشن کے حوالے سے نیب کو خظ لکھنے کا الزام بھی ہم پر لگا دیا ہے، میں انہیں بتا دینا چاہتی ہوں کہ نیب کو خط آپ کے صوبے کی عوام لکھ رہی ہے۔ ان کا کہنا تھا کہ عمران خان اور ان کے حواریوں پر جب کرپشن کے الزامات لگتے ہیں تو وہ رونا شروع کردیتے ہیں اب وہ روئیں مت اور نیب کو اپنی کرپشن کا جواب دیں۔

مریم اورنگزیب کا کہنا تھا کہ ساڑھے 3 سال میں عمران خان سے اور تو کچھ نہیں ہوا اب درخت لگانا شروع کردیئے ہیں، شکر ہے کہ انہوں نے 3 سال میں ایک درخت تو لگایا اگر وہ یہ درخت بھی نہ لگاتے تو آئندہ عام انتخابات میں عوام کے سامنے کیا منہ لے کر جاتے۔

متعلق امتیاز کاظمی